متحدہ عرب امارات میں پاکستانی سفیر فیصل نیاز ترمذی نے یہاں دبئی میں پاکستانی قونصلیٹ میں متحدہ عرب امارات میں مقیم پاکستانی میڈیا کمیونٹی سے ملاقات کی اور پاکستان اور متحدہ عرب امارات کے دیرینہ تعلقات اور دیگر معاملات پر تفصیلی بات چیت کی۔ تقریب میں میڈیا کے ارکان کی بڑی تعداد نے شرکت کی اور متحدہ عرب امارات میں سفیر ترمذی کا استقبال کیا۔ سفیر فیصل نیاز ترمذی نے 30 اکتوبر 2022 کو متحدہ عرب امارات میں پاکستان کے سفیر کی حیثیت سے اپنے فرائض کا آغاز کیا۔ سفیر ترمذی نے معاشرے میں میڈیا کے اہم کردار پر روشنی ڈالتے ہوئے کہا کہ میڈیا معاشرے کی آنکھ اور کان ہیں۔ میڈیا کے ذریعے ہی ہماری تمام کوششیں اور سرگرمیاں دنیا تک پہنچتی ہیں۔ متحدہ عرب امارات میں پاکستانی میڈیا کا کردار ہمیشہ صحیح مقصد کی حمایت کرنے اور دنیا کے ساتھ ہمارا پیغام پہنچانے کے لیے قابل تعریف ہے۔ ہم اس تعاون کو مزید بڑھانے کے منتظر ہیں، خاص طور پر اپنے ثقافتی ورثے اور پاکستان کے خوبصورت مقامات کے فروغ کے لیے۔ ہم آپ سے گزارش کرتے ہیں کہ پاکستان کی بھرپور تاریخ، اس کے منظر نامے اور متحرک ثقافت کو تمام ذرائع سے پیش کریں۔ متحدہ عرب امارات میں 16 لاکھ سے زائد پاکستانی آباد ہیں۔ پاکستانی کمیونٹی نے اپنی محنت سے متحدہ عرب امارات میں اور پاکستان میں اپنی ترسیلات زر کے ذریعے مثبت کردار ادا کیا ہے۔ سفیر ترمذی نے کہا کہ ان محنتی کمیونٹی کے ارکان کی کوششوں کو اجاگر کرتے ہوئے ان کی حوصلہ افزائی اور حمایت کرنے کی ضرورت ہے۔ میڈیا کمیونٹی نے حکومت کی کاوشوں کو اجاگر کرنے اور پاکستان کا مثبت امیج پیش کرنے میں اپنے مکمل تعاون کو یقینی بنایا۔
